除咗週會之外，城團做得最多嘅集體活動可能就係飯聚啦！🍛由完咗週會食宵、約組聚活動，甚至係傾心事呢，都會係飯枱面前發生！今次我地會介紹幾個城團團友成日都會去嘅飯聚現場，唔知你又去過幾多次呢？😝

城大中菜廳🥢

每次講起組聚，都會有人話「不如飲茶囉！」事關人人都要食飯，而康樂樓８樓又的確係一個近得黎又有好嘢食、又適合大家坐耐啲傾計嘅好地方，仲會有時發現講緊嗰個Professor就係對面張枱添！（真係日頭唔好講人...）唔知係咩原因，好似永遠都無人會叫蝦餃燒賣，但係次次都會有蛋白炒飯。大家飲個茶、食個包，分享吓近來有咩忙、有咩困難，又傾吓想城團點樣發展，講吓講吓，咁就一個下晝。

不過因肺炎肆虐同停課，幫襯嘅師生人流大減，加上缺乏校方支援，城大中菜廳係今年一月底宣佈暫停營業，或許想再飲茶的話都要一段時間了。

AC2 Canteen🥘

「幫我買盒飯啊，thx！」好多人應該都曾經被敬拜隊同週會負責人咁樣拜託過。歷年來，好多團友嘅星期五都係七點先落堂，然後喺飯都未食嘅情況下就趕去返城團，而搭其他人單買AC2外賣，就係大家醫肚嘅方法。除咗事奉人員之外，Freshman都係AC2 Can嘅常客。組爸組媽們為咗幫仔女融入城團，通常都會約喺第一次週會前約大家食AC2，自此大家就發現原來雞肉漢堡又平又好食。

AC2 Can最特別嘅地方，就係唔同時候都會有唔同嘅餐牌：上個月有湯飯、而家有韓式拉麵、下個月就變做口水煲，就好似團契一樣，有時一齊chur、有時一齊喊、有時一齊努力，唯一唔變嘅就係神嘅愛，同埋兩餸飯。

樹記🌲

以往城團週會完咗之後，樹記一定係大家嘅宵夜首選。呢間曾經位於C4舖位（現今意粉工房位置）嘅大排檔，聽講十年前嘅團友已經幫襯緊佢架啦！好就好在佢地方大，而且嘢又抵食，仲有大家最鍾意嘅大大煲蠔仔粥添！而最重要嘅就係老闆好好人，比大家可以自己拎嘢飲之餘，太多人去嘅時候，又會開多張枱比大家放袋喎，係個充滿住人情味嘅地方。

但係好景不常，一六年頭時舖頭發生火警，樹記亦都自此結業，後來嘅團友都無機會親身去食啦。雖然樹記已經不復存在，但係同城團中嘅大大小小經歷一樣，裡面一點一滴都會繼續留喺大家嘅回憶之中。

品香樓🥤

要數最受城大學生歡迎嘅飯聚地點，就一定唔可以唔提品香樓，團友們都唔例外。每次週會完咗之後，總係有人負責執野，而其他人呢就負責去攞位，「照著各體的功用彼此相助」。品香永遠都比課室熱鬧得多，大家講句野都要大聲啲「有咩想食？」明太子炒飯一定走唔甩；「邊個要凍朱呀？」放棄大叫嘅大家索性舉手示意。

「矢志朝標竿直往」彷彿就係倒數緊大家手上嘅筷子出閘時間；「阿們！」一聲，一班餓狼都群起而湧「喂我夾緊架！」「留返啲炒公仔麵俾我啊！」「仲有無人食呀我包底架啦！」逢星期五嘅深夜，大家就係咁樣打打鬧鬧渡過。雖然又迫，場面又混亂，但係彼此之間嘅團契同關係，又何嘗唔係咁樣炒埋一碟先建立到出來嘅呢？

南山宵夜檔🍢

想食宵，但又唔想坐咁迫嘅你，去南山夜市嘅各式宵夜檔就岩哂啦！呢到有齊各種街頭小食，由涼浸浸嘅豆腐花，去到新鮮出爐嘅燒賣、去到即叫即整嘅串燒都有，而最受歡迎嘅，就一定係格仔餅同雞蛋仔啦！

如果話入品香食飯係一班人開Party嘅，咁食宵夜檔就係去Winter Camp通宵吹水啦。係夜空同街燈底下，似乎大家都會講多啲心事：分享吓啲睇法、講吓heavy嘢、派吓花生、講吓人，之後再去排隊買多底雞蛋仔返黎，一路分住食一路繼續傾。傾吓傾吓，先發現原來大家都好愛呢個地方，好為城團著想，又好願意一齊同行～

原來由O Camp嘅第一個早餐開始，就已經注定食飯同團契兩者密不可分。每一次嘅飯聚，都係一齊生活、相交嘅歷程；每一串魚蛋、每一碟頹飯都印證住大家嘅成長。而你嘅胃裡面，又有幾多嘅城團嘅足跡呢？